ബെംഗളൂരു: കർണാടകയിലെ ഇലക്ട്രിക് വാഹന വിപണിയിൽ തങ്ങളുടെ ആധിപത്യം വീണ്ടും ഉറപ്പിച്ച് ബെംഗളൂരു നഗരം. ഗതാഗത വകുപ്പ് പുറത്തുവിട്ട ഏറ്റവും പുതിയ കണക്കുകൾ പ്രകാരം 2026 ആഗസ്റ്റ് മാസത്തിൽ പ്രതിദിനം ശരാശരി 2,500 പുതിയ വാഹനങ്ങളാണ് നഗരത്തിൽ രജിസ്റ്റർ ചെയ്തത്. ഇതിൽ 430 ഓളം ഇലക്ട്രിക് വാഹനങ്ങളും (EV) ഉൾപ്പെടുന്നു. ഓഗസ്റ്റ് മാസത്തിൽ കർണാടക സംസ്ഥാനത്തൊട്ടാകെ രജിസ്റ്റർ ചെയ്ത മൊത്തം ഇലക്ട്രിക് വാഹനങ്ങളുടെ പകുതിയിലധികവും ബെംഗളൂരു നഗരത്തിൽ നിന്നാണെന്നതാണ് ശ്രദ്ധേയമായ കാര്യം.
ഓഗസ്റ്റിൽ മാത്രം ബെംഗളൂരുവിൽ രജിസ്റ്റർ ചെയ്ത 76,508 പുതിയ വാഹനങ്ങളിൽ 13,389 എണ്ണവും ഇലക്ട്രിക് വാഹനങ്ങളായിരുന്നു. അതായത്, നഗരത്തിൽ രജിസ്റ്റർ ചെയ്ത മൊത്തം പുതിയ വാഹനങ്ങളുടെ 17.5 ശതമാനവും ഇലക്ട്രിക് വിഭാഗത്തിൽ പെട്ടവയാണ്. ഏകദേശം വിൽക്കപ്പെടുന്ന ഓരോ ആറ് പുതിയ വാഹനങ്ങളിലും ഒന്ന് ഇവി ആണ്. ഇതിൽ 9,453 ഇലക്ട്രിക് ഇരുചക്രവാഹനങ്ങളും 1,258 ഇലക്ട്രിക് കാറുകളും ഉൾപ്പെടുന്നു. നഗരനിരത്തുകളിലേക്ക് പ്രതിദിനം ശരാശരി 300 ഇലക്ട്രിക് ഇരുചക്രവാഹനങ്ങളും 40 ഇലക്ട്രിക് കാറുകളും മറ്റ് വിഭാഗങ്ങളിലായി 90 ഇലക്ട്രിക് വാഹനങ്ങളുമാണ് പുതുതായി എത്തുന്നത്. ബെംഗളൂരുവിൽ രജിസ്റ്റർ ചെയ്ത ഇവികളിൽ 71 ശതമാനവും ഇരുചക്രവാഹനങ്ങളും 9 ശതമാനം കാറുകളുമാണ്.
സംസ്ഥാനത്തൊട്ടാകെ ഓഗസ്റ്റിൽ രജിസ്റ്റർ ചെയ്ത 26,636 ഇലക്ട്രിക് വാഹനങ്ങളിൽ 50.3 ശതമാനവും (13,389) ബെംഗളൂരുവിലാണ്. ഓഗസ്റ്റ് 30 വരെയുള്ള കണക്കനുസരിച്ച് ബെംഗളൂരുവിൽ ആകെ 4.9 ലക്ഷത്തിലധികം രജിസ്റ്റർ ചെയ്ത ഇലക്ട്രിക് വാഹനങ്ങളുണ്ട്. കർണാടകയിലെ മൊത്തം ഇലക്ട്രിക് വാഹനങ്ങളുടെ (8.9 ലക്ഷം) 56 ശതമാനത്തോളമാണിത്. ഇതിൽ 3.8 ലക്ഷം ഇരുചക്രവാഹനങ്ങളും 46,596 കാറുകളും 2,009 ബസുകളും ഉൾപ്പെടുന്നു. വാണിജ്യ ആവശ്യങ്ങൾക്കുള്ള ഇലക്ട്രിക് വാഹനങ്ങളിൽ 9,922 മോട്ടോർ ക്യാബുകളും 6,855 പാസഞ്ചർ ത്രീ-വീലറുകളും 9,876 ഗുഡ്സ് ത്രീ-വീലറുകളും നഗരത്തിലുണ്ട്. 2019-20 കാലഘട്ടത്തെ അപേക്ഷിച്ച് 2025-26 വർഷത്തിലെ വാർഷിക ഇലക്ട്രിക് വാഹന രജിസ്ട്രേഷൻ നിരക്കിൽ 32 മടങ്ങ് വൻ വർദ്ധനവാണ് രേഖപ്പെടുത്തിയിരിക്കുന്നത്.
